Thursday, May 30, 2013

අපි කතා නොකරම ඉමු ආයෙත් අපේ ආදරේ ගැන....
තනිකම හොඳයි මට ඇති නුඹේ මතකයම...
මා වෙනුවෙන් නුඹේ නෙතට කඳුලක් ඇති උනොත් හෙම...
සමාවෙයන් මට මමමයි වැරදි සැමටම....

හඬන මගේ හිත හදාගන්නට බැරි උනොත් හෙම..
ලියන්නම් කවි අතට හසුවන හැම කොලේකම...
එපා නුඹ කියවන්නට ඒ කවි කිසිම දින...
හැඬුවොතින් නුඹ දරාගන්නේ කොහොම මම...

ආදරයට ආදරයෙන්ම සිටියෙමි මම..
නැති උනදා තනි වෙලා අපෙ ලෝකයෙම..
කිසිදා මම නුඹේ මතකයට ආවොතින් හෙම...
නැවතත් හැරී බලන්න මම ඉඳිමි එතනම...

Tuesday, May 28, 2013

සිහින පොතේ
හිස් පිටුවක්
සොයලා..

ආයෙත්
අලුතෙන් ලියමුද
වැරදුන තැන්
හදලා...

හැම සිහිනෙකම
නුඹ මා ලඟ
සිටි හන්දා...

හිස් පිටුවක්
සොයන්නට
හැකි වෙයිදෝ මන්දා..

Wednesday, May 22, 2013


සීමා නැතිව
ආදරය දුන්නත්
නුඹ මට...

නොසිතූ ලෙසින්
සිදුවූ වරදේ
පාපයට...

නුඹ වෙනුවෙන්
තව වද වෙනු
බැරිය මට...

වරද මගෙන්
සඟවාපන්
ලෝකයට...

Tuesday, May 21, 2013

පුලුවන් වෙයිද 
මං වෙනුවෙන් 
වෙන් කරගන්න 
අඩුම තරමින් 
මාසෙකට එක 
මිනිත්තුවක්....

ඔයා ලඟ 
මොහොතක් ඉන්න එකත්
මට දැන් ලොකු 
බලාපොරොත්තුවක්...
බිල ගෙවන්නට 
ගෙදර ටීවී එකත් 
උකස් කරපු 
හන්දා..

සුජාත දියනිය
මාත් එක්කත්
තරහා වේවිද
මන්දා..

උගේ පිටපත
බලා සැනසෙන්නට
විදියකුත් නැති
හන්දා..

සුරංගනා කතා නැතිව
පොඩි උන්
අප්සට් ගනීද
මන්දා..

හෙට අනිද්දා
බිල ආවම
දැනෙයි අපිට
රඟේ

මහා රජාණෝ
අපි වෙනුවෙන්
දුන්න සහන
අගේ

ඡන්දේ දුන්න
උන්දැලටත්
කරන්ට් වැදිලා
වගේ

ලාම්පුවත්
හිනා උනේ
කින්ඩියටම
වගේ

Monday, May 20, 2013

වැස්ස එදා වගේමයි...


වැහි වතුරෙන් මූණ තෙමුනම
ඇහෙන් වැටෙන කඳුලු කාටවත් පේන එකක් නෑ...
ඒක නිසා අදත් මම තෙමි තෙමීම යනවා...
ඉක්මනින් යන නිසා එදා අපි ගියා වගේ
කුඩේ යටින් යන අයව මට පෙනෙන එකක් නෑ...
වැස්ස එදා වගේමයි...
සීතලත් එදාට නොදෙවෙනියි...

සිටියා නම් ඔබ

සිටියා නම් ඔබ
එදා වාගෙම අදත්
තෙමි තෙමි නොතෙමී
යන්නට තිබුනා
පොඩි කුඩේ යටින්....

Thursday, May 9, 2013

බෝල මිටියට
පෙම් බැන්ද
කරගැට වලින්
පිරි මගෙ අත්...
සියුමැලි නුඹේ අතට
තද වැඩි වෙයිද මන්දා...

අව්වට පිලිස්සුන,
දහඩියෙන් නැහැව ගිය
මගේ මේ උර මඩල
නුඹට
තද වැඩිදෝ මන්දා...

වැහිලිය ගෙතුලටම විත්
අදත් නුඹව
පිලිගනීවිදෝ මන්දා...

කට කැඩුන, අඬුව නැති
මගේ කෝප්පයේ වතුර
නුඹේ ඔය පිපාසෙට
පිහිටක් වේවිදෝ මන්දා...

ගල් ගැහුන මගේ හද
නුඹේ ඔය සෙනෙහෙ දියෙන්
කවදා තෙත් වේවිදෝ මන්දා...

කිසිවකුගේ අනුකම්පා නැති
මට
නුඹ මෙතරම් ආදරේ
මොකදෝ මන්දා
රෑ සිහිනෙන් නුඹ එනවද
මගේ සිහිනෙට පාට දෙන්න....
රෑ අහසට නුඹ එනවද
මාත් එක්ක තරු ගනින්න..
හඳ පානේ ඇවිද යමුද
දෙවැට දිගේ දෙමන්සලට...
අපේ කතා අහන් ඉන්න
කවුරුත් නෑ ඒ යාමෙට..

හමා ඇදෙන සුලන් රොදට
දහසක් කන් ඇති උනාට...
අහගෙන ගෙනිහින් කියන්න
කටක් නැත්තේ අපේ හොඳට...
කවි මුමුනන නුඹෙ තොල්පෙති
තවත් වරක් සිපගන්නද...
අද වේවිත හොඳම දවස
නුඹ සිටිනා මගෙ තනියට..

Monday, May 6, 2013

නු ඹේ | සු ව ඳ

මතක අතරින් එකින් එක ගෙන
තවම මම හැඩ බලනවා....
අතට අසුවන හැම කොලේකම
පුංචි කවියක් ලියනවා...
ලියවෙනා හැම කවක් ගානෙම
අපේ ආදරේ තියෙනවා...
සොඳුර නුඹේ සුවඳ තාම මා වට
ගැවසෙනා බව දැනෙනවා...